کۆڵبەرێکی گەنج بە لێدانی هێزەکانی هەنگی مەرزی لە سنووری هەنگەژاڵ بریندار بوو.
بەپێی زانیارییەکانی کۆڵبەرنیوز، شەوی ڕابردوو هەینی ٢٥ی ڕەشەمەی ١٤٠٢، هێزەکانی هەنگی مەرزی لە سنووری هەنگەژاڵی بانە دوای دەست گرتن بەسەر کۆڵەکەیدا، بە قۆناخە تفەنگ لە کۆڵبەرێکی گەنجیان دا و دەست و دەموچاوی ئەم کۆڵبەرەیان بریندار کردووە.
بە پێی هەواڵەکە، ناسنامەی ئەم کۆڵبەرە «کاوان ڕۆستەمی» ٢٤ ساڵە و خەڵکی کامێرانە.
بەپێی ئەو ئامارانەی ٢٠٢٣ لە کۆڵبەرنیوز تۆمارکراون، ٢٩٩ کۆڵبەر لە سنورەکان و ڕێگای نێوان ئازەربایجانی ڕۆژئاوا، کوردستان و کرماشان بە هۆکاری وەک تەقەی ڕاستەوخۆی هێزەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوار لە شاخ، بەرزایی و حاڵەتی دیکە کوژران و بریندار بوون. لەم ژمارەیە ٣٢ کۆڵبەر (١١%) کوژران و ٢٦٧ کۆڵبەر (٨٩%) بریندار بوون. بە گشتی ٢٩٩ کۆڵبەر کە کوژران و بریندار بوون، ٢٦١ حاڵەت (٨٧%) بە تەقەی ڕاستەوخۆی هێزەکان بووە. بە گشتی ٢٩٩ کۆڵبەر کە کوژران و بریندار بوون، ٣٠ لەوانە منداڵی خوار ١٨ ساڵن.
