کۆڵبەرێک لە بەرزاییەکانی سنووری تەتە بەهۆی کەوتنەخوارەوە بە سەختی بریندار بوو.
بەپێی زانیاریەکانی کۆڵبەرنیوز، هەینی ٢٠ ڕێبەندانی ١٤٠٢، کۆڵبەرێک لەکاتی تێپەڕێن لە بەرزاییەکانی سنووری تەتە کەوتە خوارەوە و بە سەختی بریندار بوو. ناسنامەی ئەو کۆڵبەرە “ڕەشاد بابایی”، تەمەن ٣٠ ساڵ و خەڵکی شاری سنە، بۆ کۆڵبەر نیوز پشتڕاست کراوەتەوە.
هەروەها ئەو کۆڵبەرە لە یەکێک لە نەخۆشخانەکانی هەورامان چارەسەری سەرەتایی بۆ کراوە و ڕاپۆرتەکان ئەوە دەڵێن کە بە هۆی خراپتربوونی باری تەندروستیەوە دەگوازرێتەوە بۆ نەخۆشخانەی شاری مەریوان.
بەپێی ئەو ئامارانەی ٢٠٢٣ لە کۆڵبەرنیوز تۆمارکراون، ٢٩٩ کۆڵبەر لە سنورەکان و ڕێگای نێوان ئازەربایجانی ڕۆژئاوا، کوردستان و کرماشان بە هۆکاری وەک تەقەی ڕاستەوخۆی هێزەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوار لە شاخ و بەرزایی و حاڵەتی دیکە کوژران و بریندار بوون. لەم ژمارەیە ٣٢ کۆڵبەر (١١%) کوژران و ٢٦٧ کۆڵبەر (٨٩%) بریندار بوون. بە گشتی ٢٩٩ کۆڵبەر کە کوژران و بریندار بوون، ٢٦١ حاڵەت (٨٧%) بە تەقەی ڕاستەوخۆی هێزەکان بووە. بە گشتی ٢٩٩ کۆڵبەر کە کوژران و بریندار بوون، ٣٠ لەوانە منداڵی خوار ١٨ ساڵن.
