مۆبین دەهار تەمەن ٢٠ ساڵ و سەمەد شابۆیی تەمەن ٣٨ ساڵ لەلایەن هێزە ئەمنییەکانی شاری شنۆ دەستبەسەر و بۆ شوێنێکی نادیار گوازرانەوە.
بەپێی ڕاپۆرتی کۆڵبەرنیوز، ڕۆژی سێشەممە ٣١ی گەلاوێژی ١٤٠٢، مۆبین دەهار، تەمەن ٢٠ ساڵ، خەڵکی گوندی “سینگان” سەر با شاری شنۆ، لەلایەن هێزە ئەمنییەکانی شاری شنۆ دەستبەسەر و بۆ شوێنێکی نادیار گواسترایەوە.
بەپێی هەواڵێکی دیکە، ڕۆژی دووشەممە ڕێکەوتی ٣٠ی گەلاوێژی ١٤٠٢، سەمەد شابۆیی تەمەن ٣٨ ساڵ دانیشتووی گوندی شاهوانە سەر بە شاری شنۆ، لەلایەن هێزە ئەمنییەکانی ئەو شارە دەستبەسەر و بۆ شوێنێکی نادیار گوازرایەوە.
شایانی باسە کە بەرەبەیانی ڕۆژی چوارشەممە ڕێکەوتی ٢١ی پووشپەڕی ١٤٠٢، سیامەند شابۆیی ئەندامی حیزبی دێموکراتی کوردستانی ئێران و برای سەمەد شابۆیی لەلایەن دزەکارانی کۆماری ئیسلامی ئێرانەوە بە چەکی ئاگرین لە ” ناحیەی بەحرکە” سەر بە شاری هەولێری پایتەختی هەرێمی کوردستان تیرۆر کرا.
دەستگیرکردنی ئەو دوو هاووڵاتییە بەبێ فەرمانی دادوەری ئەنجامدراوە و تا ساتی نووسینی ئەم ڕاپۆرتە هیچ زانیارییەک لە بەردەستدا نییە سەبارەت بە هۆکاری دەستگیرکردنەکە و شوێنی دەستبەسەرکردنیان و ئەو تۆمەتانەی کە بۆ ئەو هاووڵاتیانە گەڕێندراونەتەوە.
