ڕۆژی چوارشەممە ١٦ی ڕەشەممەی ١٤٠٢، هێزەکانی ڕژیم لە دانانی بۆسە و تەقەی ڕاستەوخۆ بەرەو کۆڵبەران لە هێڵی سنووری نەوسوود، کۆڵبەرێک بە سەختی برینداربوو.
بەپێی ڕاپۆرتی کۆڵبەرنیوز، هێزەکانی هەنگی مەرزی ڕژیم لە هێڵی سنووری نەوسوود، بەرەو کۆمەڵێک لە کۆڵبەران تەقەیان کرد و بەهۆیەوە کۆڵبەرێک بە ناسنامەی «عەتا حسێنی» هاووڵاتی گوندی «بلەبزان»ی سەر بە شاری پاوە بە سەختی برینداربوو.
بە وتەی سەرچاوەیەکی ئاگادار، عەتا حوسێنی بەمەبەستی چارەسەر بۆ یەکێک لە ناوەندە پزیشکییەکانی نەوسوود گواستراوەتەوە، بەڵام بەهۆی سەختی برینەکانی، ئەگەری ڕەوانەکردنی بۆ نەخۆشخانەی پاوە لە ئارادایە.
لە ڕووداوێکی هاوشێوەدا، هێزەکانی هەنگی مەرزی ڕژیم لە هێڵی سنووری هەنگەژاڵی بانە بەهۆی تەقەی ڕاستەوخۆ بەرەو کۆڵبەران، کۆڵبەرێک بە ناسنامەی «مەهدی ئەنوەری» ٢٣ ساڵە و خەڵکی شاری سەقز، لە “لاقی”یەوە بریندارکردووە.
بەپێی ئەو ئامارانەی ٢٠٢٣ لە کۆڵبەرنیوز تۆمارکراون، ٢٩٩ کۆڵبەر لە سنورەکان و ڕێگای نێوان ئازەربایجانی ڕۆژئاوا، کوردستان و کرماشان بە هۆکاری وەک تەقەی ڕاستەوخۆی هێزەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوار لە شاخ، بەرزایی و حاڵەتی دیکە کوژران و بریندار بوون. لەم ژمارەیە ٣٢ کۆڵبەر (١١%) کوژران و ٢٦٧ کۆڵبەر (٨٩%) بریندار بوون. بە گشتی ٢٩٩ کۆڵبەر کە کوژران و بریندار بوون، ٢٦١ حاڵەت (٨٧%) بە تەقەی ڕاستەوخۆی هێزەکان بووە. بە گشتی ٢٩٩ کۆڵبەر کە کوژران و بریندار بوون، ٣٠ لەوانە منداڵی خوار ١٨ ساڵن.
