شەریف ئاشناب، گەنجی خەڵکی مەلەکشایی، پاش تێپەڕبوونی ١٩ ڕۆژ بەسەر دەستبەسەرکردنیدا، دوای گواستنەوەی بۆ گرتووخانەیەکی نادیار و لێپرسینەوەی، بۆ زیندانی ناوەندیی ئیلام گوازرایەوە و هێشتا بەبێ بوونی پارێزەر چارەنووسی نادیارە.
بەپێی ڕاپۆرتی کۆڵبەرنیوز، ڕۆژی چوارشەممە ٨ی ڕەزبەری ١٤٠٥، شەریف ئاشناب، گەنجی خەڵکی مەلەکشایی لە پارێزگای ئیلام، بەبێ بڕیاری دادگا لەلایەن هێزەکانی ڕژێم دەستبەسەر کرا و لە کاتی دەستبەسەرکردنیدا کەوتووەتە بەر لێدان. هێزەکانی ڕژێم دوای دەستبەسەرکردنی، ناوبراویان بۆ شوێنێکی نادیار گواستەوە.
بەپێی زانیارییەکان، ئەم هاووڵاتییە دوای چەند ڕۆژ لێپرسینەوە لە گرتووخانەیەکی نادیاردا، بۆ زیندانی ناوەندیی ئیلام گوازرایەوە و بە تێپەڕبوونی نۆزدە ڕۆژ لە کاتی دەستبەسەرکردنی، هێشتا لە دۆخێکی نادیاردا ڕاگیراوە.
شەریف ئاشناب لە ماوەی دەستبەسەرکردن و لێپرسینەوەکەیدا، لە چاوپێکەوتن و پەیوەندیگرتن بە بنەماڵەکەی بێبەش کراوە و تا ئێستاش مافی پارێزەری پێ نەدراوە.
تا کاتی ئامادەکردنی ئەم ڕاپۆرتە، هیچ زانیارییەک سەبارەت بە هۆکارەکانی دەستبەسەرکردنی ئەم هاووڵاتییە بڵاو نەکراوەتەوە و ناوەندەکانی ئەمنیی هیچ ڕوونکردنەوەیەکیان لەسەر هۆکاری دەستبەسەرکردن و دۆخی دۆسیەکەی نەداوە.
