یوسف دێهقانی، یەکێک لە ئەندامانی کادری تەندروستی و دەستبەسەرکراوانی ناڕەزایەتییەکانی بەفرانباری ١٤٠٤، لەلایەن دەزگای دادوەریی کۆماری ئیسلامیی ئێرانەوە بە کۆمەڵێک سزا، لەوانە: زیندانی تەعزیری، زیندانی تەعلیقی، دوورخرانەوە، قامچی و سزای نەغدی سزا درا.
بەپێی ڕاپۆرتی کۆڵبەرنیوز، یوسف دێهقانی کە لە ماوەی ناڕەزایەتییەکانی بەفرانباری ١٤٠٤ لەلایەن هێزەکانی ئیدارەی ئیتلاعاتەوە لە شوێنی کارەکەی لە نەخۆشخانە دەستبەسەر کرابوو، دوای چەندین مانگ لە بێ ئاگایی لە چارەنووسی، لە دوو دۆسیەی جیاوازدا لە دادگای تاوانەکان و دادگای ئینقلابی قوروە بە سزای جیاواز سزا دراوە.
بەپێی ئەو بڕیارەی لەلایەن لقێکی دادگای تاوانی قروە بە سەرۆکایەتیی دادوەر هادی خانی دەرچووە، ناوبراو بە یەک ساڵ زیندانی تەعزیری، دوو ساڵ دوورخرانەوە بۆ شاری زابول و ٣١ قامچی سزا دراوە.
هەروەها، لقێکی دادگای ئینقلابی قوروە بە سەرۆکایەتیی دادوەر حوسێن بێگدلو، لە دۆسیەیەکی دیکەدا، بڕیاری دوو ساڵ زیندانی تەعلیقی و دانی سزای نەغدی دژی ئەم هاوڵاتییە دەرکردووە.
یوسف دێهقانی پێشتریش لە ماوەی بزووتنەوەی شۆڕشگێڕانەی ژینادا لەلایەن دامودەزگا حکوومییەکانەوە بانگهێشت کرابوو و لێکۆڵینەوەی لەگەڵدا کرابوو.
