“محەممەد کەریم نژاد”، کۆڵبەری خەڵکی شاری بانە بەهۆی تەقەی هێزەکانی هەنگی مەرزی لە سنووری هەنگەژاڵی بانە بریندار بوو.
بەپێی ڕاپۆرتی کۆڵبەرنیوز، ئێوارەی ڕۆژی یەکشەممە ٥ی سەرماوەزی ١٤٠٢، کۆڵبەرێکی خەڵکی شاری بانە لە سنووری هەنگەژاڵی بانە لەلایەن هێزەکانی هەنگی مەرزی بە گوللەی ساچمەیی “قاچ و پشت” ی پێکراو و بە سەختی بریندار بووە.
بەپێی ئەم ڕاپۆرتە، ناسنامەی ئەم کۆڵبەرە “محەمەد کەریم نژاد” خەڵکی شاری بانە ڕاگەیاندراوە، کە بەهۆی پێکرانی بە گولـلەی ساچمەیی لە قاچ و پشتی بە سەختی بریندار بووە.
بەپشتبەستن بەو ئامارەی لە ماوەی دوو مانگی ڕابردوودا لە کۆڵبەرنیوز تۆمارکراوە، لە ١ی ڕەزبەر تا ١ ی سەرماوەزی ١٤٠٢، بەگشتی ١٥٤ کۆڵبەر لە ناوچە سنوورییەکانی کوردستان بەهۆی هۆکارەکانی وەک تەقەی ڕاستەوخۆی هێزەکانی هەنگی مەرزی، لێدان و ئازاردان لەلایەن هێزە سەربازییەکانی ڕژێم و کەوتنە سەر مین. کوژراو و بریندار بوون.
لەم ژمارەیە بەگشتی ٩ کۆڵبەر کوژراون و ١٤٥ کۆڵبەر برینداربوون. لە کۆی گشتی ١٥٤ کۆڵبەر کە کوژراون و برینداربوون، ١٤١ حاڵەت (٩٢%) بەهۆی تەقەی ڕاستەوخۆی هێزە سەربازییەکان بووە.
