دوای دەستبەسەرداگرتنی موڵک و ماڵی کاسبکاران، هێزە نیزامییەکان، هەڵیانکوتایە سەر ماڵی کاسبکارانی گوندی سەریاس سەر بە شاری پاوە و پێنج هاوڵاتییان دەستبەسەر و هاوڵاتییەکی دیکەشیان بریندار کرد.
بە پێی ڕاپۆرتی کۆڵبەرنیوز، ڕۆژی دووشەممە ٢ی گەلاوێژی ساڵی ١٤٠٢، هێزە نیزامییەکان لە گوندی سەریاس سەر بە شاری پاوە هەڵیانکوتایە سەر ماڵی کاسبکاران، دوای دەستبەسەرداگرتنی موڵک و ماڵی ئەو کاسبکارانە، ٥ هاوڵاتییان دەستبەسەر و هاوڵاتییەکیشیان بریندار کرد.
به پێی ئەم ڕاپۆرته، سەروەت حوسێنی، ئارمان مەحموودی، خەبات عەزیزی، تاعەت ساڵحی و سەمیر شوشمی لەلایەن هێزه سەربازییەکانەوه دەستگیرکراون و کەسێکی دیکەش بەناوی فواد حوسێنی بریندار بووه.
بەپێی ئەم ڕاپۆرتە، هێزە نیزامییەکان بە زیاتر لە ٢٠ ئۆتۆمبێلەوە هەڵیانکوتایە سەر گوندی سەریاسی پاوە و ماڵی کاسبکاران و ئەو ٥ هاوڵاتییەیان بە نواندنی توندوتیژی و لێدان دەستبەسەر کرد. دوابەدوای خۆڕاگری خەڵکی گوندی سێریاس و ڕوودانی ململانێ، هێزەکانی حکومەت تەقەیان کرد و لانیکەم هاوڵاتییەک بە ناوی فواد حوسێنی بریندار بوو.
