بە تێپەڕبوونی سی و دوو ڕۆژ لە دەستبەسەرکرانی سەرەڕۆیانەی «ئیبراهیم ڕۆستەمی»، هاوڵاتیی خەڵکی کامیاران و باوکی دوو کچ، هێشتا هیچ زانیارییەکی ڕوون لەبارەی دۆخی تەندروستی، شوێنی ڕاگرتن و چارەنووسی ناوبراو لە دەستدا نییە و بێ ئاگایی تەواو، نیگەرانی جدی خێزانەکەی بەدوای خۆیدا هێناوە.
بەپێی ڕاپۆرتی کۆڵبەرنیوز، ڕۆژی هەینی ١٩ی بەفرانباری ١٤٠٤، ئیبراهیم ڕۆستەمی هاوڵاتی شاری کامیاران بەبێ بوونی بڕیاری دادوەری و لەلایەن هێزە ئەمنییەکانەوە دەستبەسەر و بۆ گرتووخانەی ئیتلاعاتی سنە گواستراوەتەوە. ئەم هاوڵاتییە لە چوارەمین ڕۆژی دەستبەسەرکرانیدا، لە ڕێگەی پەیوەندییەکی کورتەوە لەگەڵ خێزانەکەیدا، هەواڵی ئەشکەنجە و فشاری جەستەیی و دەروونی توندی ڕایگەیاندووە کە لە ناڕەزایەتی بەرامبەر بە بارودۆخی دەستبەسەرکرانی، دەستی بە مانگرتن لە خواردن کردووە.
دوای ئەم پەیوەندییە، پەیوەندی ناوبراو بە تەواوی لەگەڵ خێزانەکەیدا پچڕاوە و لەو کاتەوە تا ئێستا هیچ زانیارییەک دەربارەی دۆخی تەندروستی، شوێنی ڕاگرتن و پڕۆسەی ناوبراو بڵاو نەکراوەتەوە.
بەپێی زانیارییە بەردەستەکان، «ئیبراهیم ڕۆستەمی» لە تەواوی ماوەی دەستبەسەرکرانیدا لە مافی دەسڕاگەیشتن بە پارێزەر، پەیوەندی تەلەفۆنی و چاوپێکەوتن لەگەڵ خێزانەکەی بێبەش کراوە و بەردەوامبوونی ئەم دۆخە، نیگەرانییەکان سەبارەت بە ژیان و ئاسایشی ناوبراو زیاتر کردووە.
