“عەبدولڕەحمان غوڵامی”، کۆڵبەری خەڵکی شاری سنە لەلایەن هێزەکانی هەنگی مەرزی لە سنووری هەورامان لێدان و ئەشکەنجەکرا و برینداربوو.
بەپێی ڕاپۆرتی کۆڵبەرنیوز ئێوارەی هەینی ٢٣ی خەرمانانی ١٤٠٣، هێزەکانی هەنگی مەرزی لە سنووری هەورامان کۆڵبەرێکیان دەستبەسەرکرد و لێدان و ئەشکەنجە و بریندارکرد. ناسنامەی ئەم کۆڵبەرە “عەبدولڕەحمان غوڵامی”، تەقریبەن ٣٥ ساڵ تەمەن و خەڵکی گوندی سەرهۆیە لە ژاوەرۆی سنە بۆ کۆڵبەرنیوز ڕاگەیەندراوە. بەپێی ئەم ڕاپۆرتە ناوبراو سەر، دەموچاو، ڕان و پێی برینداربووە.
بە گوێرەی ئامارەکانی کۆڵبەرنیوز، لە نیوەی یەکەمی ٢٠٢٤، ٢٧٠ کۆڵبەر لە ناوچە سنوورییەکان و ڕێگاکانی نێوان پارێزگاکانی ئازەربایجانی ڕۆژئاوا، کوردستان و کرماشان بە هۆکارەکانی وەک تەقەی ڕاستەوخۆی هێزە سەربازییەکانی ڕژیم، سەرما، کەوتنەسەر مین، کەوتنە خوارەوە لە شاخ و بەرزایی و حاڵەتەکانی تر کوژران و برینداربوون. لەم ژمارەیە، ٣٤ کۆڵبەر واتا ١٣٪ کوژران و ٢٣٦ کۆڵبەر واتا ٨٧٪ برینداربوون.
لە ٢٧٠ کۆڵبەر لە نیوەی یەکەمی ٢٠٢٤ کوژران و برینداربوون، ٢٢٢ کۆڵبەر واتا ٨٢٪ بەهۆی تەقەی ڕاستەوخۆ یان لێدان و ئەشکەنجەی هێزەکانی ڕژیمەوە بووە.
هەروەها لە ٢٧٠ کۆڵبەر لە نیوەی یەکەمی ٢٠٢٤ لە سنووری کوردستان کوژران و برینداربوون، ٢٠ کۆڵبەریان منداڵی خوار تەمەن ١٨ ساڵن.
ئاماری نیوەی یەکەمی ٢٠٢٤، بە بەراورد بە نیوەی یەکەمی ٢٠٢٣، ئێمە چاودێری زیادبوونی ٢١٨٪ ڕێژەی کوژراو و برینداربوونی کۆڵبەران لە هێڵی سنووری کوردستان بووین.
