کۆڵبەرێک لە هێڵی سنووری بانە بە تەقەی ڕاستەوخۆی پاسەوانانی سنووری ڕژێم بریندار بوو.
بەگوێرەی ڕاپۆرتی کۆڵبەرنیوز، ئێوارەی یەکشەممە ٢٤ بەفرانباری ١٤٠٢، کۆڵبەرێک بە تەقەی هێزەکانی هەنگی مەرزی لە سنووری هەنگەژاڵ-بانە قاچی بە سەختی بریندارە.
بەپێی ڕاپۆرتەکە ناوی ئەم کۆڵبەرە بە داخەوە نادیارە بەڵام ناسناوی “مورادی”، تەمەنی ٢٨ ساڵ و خەڵکی سەقز ڕاگەیەندرا.
بە پشتبەستن بەو ئامارانەی لە ساڵی ٢٠٢٣ی زایینیدا لە کۆڵبەرنیوز تۆمارکراون، بە گشتی ٢٩٩ کۆڵبەر لە ناوچە سنوورییەکان و ڕێگاکانی نێوان جادەکانی پارێزگاکانی ئازەربایجانی ڕۆژئاوا، کوردستان و کرماشان بەهۆی هۆکارەکانی وەک تەقەی ڕاستەوخۆی هێزە نیزامییەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوارەوە لە شاخ و بەرزاییەکان و حاڵەتەکانی ترەوە کوژراون و بریندار بوون. لەم ژمارەیە بەگشتیی ٣٢ کۆڵبەر (١١%) کوژراون و ٢٦٧ کۆڵبەر (٨٩%) بریندار بوون. لە کۆی گشتی ٢٩٩ کۆڵبەری کە کوژراون و بریندار بوون، ٢٦١ حاڵەت (٨٧%) بەهۆی تەقەی ڕاستەوخۆی هێزە سەربازییەکان بووە. لە کۆی گشتی ٢٩٩ کۆڵبەری کە کوژراون و بریندار بوون، ٣٠ کەسیان منداڵی خوار ١٨ ساڵن.
