«سەباح بێوارە»، گەنجێکی تەمەن ٢٣ ساڵی خەڵکی گوندی «کەلەکین»ی سەربە شاری پیرانشار، لە درێژەی شەپۆلی دەستبەسەرکردنی هاووڵاتییان لەلایەن هێزەکانی ڕژیم، بە شێوازێکی توندوتیژانە دەستبەسەر و بۆ شوێنێکی نادیار گواسترایەوە؛ ئەمەش لە کاتێکدایە کە دوای تێپەڕبوونی دوو ڕۆژ بەسەر ئەم ڕووداوەدا، بنەماڵەکەی هێشتا لە دۆخی بێخەبەریی تەواوەتیدا لە دۆخ و شوێنی ڕاگرتنیدا بەسەردەبەن.
بەپێی ڕاپۆرتی کۆڵبەرنیوز، ئێوارەی پێنجشەممە ٢٤ی گوڵانی ١٤٠٥، هێزەکانی ڕژیم هەڵیانکوتاوەتە سەر ماڵی باوکیی سەباح بێوارە لە گوندی «کەلەکین» و بەبێ پێشاندانی هیچ جۆرە حوکمێکی دادوەری دەستبەسەریان کردووە. بەپێی زانیارییە سەرەتاییەکان، ئەم دەستبەسەرکردنە لەگەڵ بەکارهێنانی توندوتیژی لەلایەن هێزەکانی ڕژیم ئەنجامدراوە و ئەم هاووڵاتییە کوردە دوای دەستبەسەرکردنی بۆ شوێنێکی نادیار گواستراوەتەوە.
تا کاتی ئامادەکردنی ئەم ڕاپۆرتە، هیچ جۆرە زانیارییەک سەبارەت بە هۆکارەکانی دەستبەسەرکردن، تۆمەتەکانی دژی و شوێنی ڕاگرتنی سەباح بێوارە بڵاو نەکراوەتەوە. هەروەها ناوبراو لە کاتی دەستبەسەرکرانییەوە تا ئێستا لە مافی پێوەندیی تەلەفۆنی لەگەڵ بنەماڵەکەی، بوونی پارێزەر و چاوپێکەوتن بێبەش کراوە و بەدواداچوونەکانی بنەماڵەکەشی تا ئێستا بێ وەڵام ماوەتەوە.
