ناسیح فەیزی، کرێکارێکی مەعدەنی شاری بۆکان، بەهۆی نەبوونی ستانداردەکانی ئەمنییەتی و کەمتەرخەمی لە دۆخی کاری کرێکاراندا، گیانی لەدەستدا.
بەپێی ڕاپۆرتی کۆڵبەرنیوز، ناسیح فەیزی، کرێکاری تەمەن ٤٥ ساڵ خەڵکی گوندی داشغەل لە شاری بۆکان، لە مەعدەنێکی ئاسنی ئەم ناوچەیەدا گیانی لەدەستدا. ڕاپۆرتەکان باس لەوە دەکەن کە نەبوونی ستانداردەکانی ئەمنییەتی و کەمتەرخەمی لە دۆخی کاری کرێکاران لە مەعدەنەکاندا، هۆکاری سەرەکی ئەم ڕووداوە بووە.
ئەم ڕووداوە لە کاتێکدا ڕوویداوە کە تەنیا چەند ڕۆژ پێشتر، لە مەعدەنی بەردی ئاسنی عەبدوڵڵا ئاوا لە شاری مەهاباد، داڕمانی دیوارەکان بووە هۆی گیان لەدەستدانی کرێکارێک و برینداربوونی کرێکارێکی دیکە. ئەم مەعدەنە لە ڕێگای نێوان شاری مەهاباد – بۆکانە، پاش خولێکی پشوودان لە زستاندا، دەستی بە چالاکییەکانی کردبوووەوە.
بەپێی ڕاپۆرتی ناوەندی لێکۆڵینەوەکانی مەجلیس، لە ساڵانی ١٤٠٠ و ١٤٠١، ڕێژەی ٣،٨٢٦ کەس بەهۆی ڕووداوەکانی کارەوە گیانیان لەدەستداوە. لەم ژمارەیە، ٨ لە سەد پێوەندی بە ڕووداوەکانی مەعدەنەکانەوە هەبووە.
هەروەها، ڕاپۆرتەکان باس لەوە دەکەن لە کەمتر لە ٤٨ کاتژمێردا، ٨ کرێکاری مەعدەن لە ئێران گیانیان لەدەستداوە؛ هاوڵاتییەک لە مەعدەنی شاری مەهاباد بەهۆی داڕمانی دیوارەکان و ٧ کەس لە مەعدەنی خەڵوزی دامغان بەهۆی گازکردن و نەبوونی ئامێری سەلامەتی.
