
یاسر ڕەیحانی، هاووڵاتیی کوردی خەڵکی بجنوورد و یەکێک لە دەستبەسەرکراوانی خۆپیشاندانەکانی مانگی بەفرانباری ساڵی ڕابردوو، لەلایەن دەزگای دادوەریی کۆماری ئیسلامیی ئێران بە دوو ساڵ و سێ مانگ زیندانیی، ٨٠ لێدانی قامچی و پێبژاردنی سزای دارایی سزادرا.
بەپێی ڕاپۆرتی کۆڵبەرنیوز، ئەم هاووڵاتییە تەمەن ٣٦ ساڵانە دوای بەڕێوەچوونی قۆناغەکانی دادگاییکردنی، بەپێی سزای دادگا، بە دوو ساڵ و سێ مانگ زیندانیی، سزای ٨٠ لێدانیی قامچی و پێبژاردنی سزای دارایی سزادراوە.
یاسر ڕەیحانی ڕۆژی بیستی ڕێبەندانی ١٤٠٤، لە دوای هێرشی هێزەکانی ڕژێم بۆ سەر ماڵی تایبەتیی خۆی لە بجنوورد دەستگیرکرا. هێزەکانی ڕژێم ناوبراویان دوای پشکنینی ماڵەکەی، بۆ شوێنێکی نادیار گواستەوە.
ئەم هاووڵاتییە دوای نزیکەی مانگێک لە دەستبەسەرکردنی، لە ڕۆژی بیستی ڕەشەممەی ١٤٠٤، بە دانانی بارمتە و بە کاتی تا کۆتاییهاتنی ڕەوتی دادوەری لە زیندان ئازاد کرا.
دەرکردنی سزاکانی زیندانیی، قامچی و سزای دارایی دژی دەستبەسەرکراوانی خۆپیشاندانەکان، لە کاتێکدا بەردەوامە کە ڕێکخراو و ناوەندەکانی مافی مرۆڤ چەندین جار نیگەرانیی خۆیان سەبارەت بە ڕەوتی دادگایی، شێوازی دادگایی دۆسیە سیاسییەکان و دەرکردنی سزا قورسەکان دژی خۆپیشاندەران دەربڕیوە.

