بەهۆی نەبوونی ئەمنییەتی شوێنی کار و دۆخی ناجێگیری کارەوە، ڕەحمەتوئەڵڵا بەختیاری، کرێکاری کانە ئاڵتوونی قوڕوە گیانی لەدەستدا.
بەپێی ڕاپۆرتی کۆڵبەرنیوز، ئێوارەی یەکشەممە ٢٧ی خەزەڵوەری ١٤٠٣ کرێکارێکی کانە ئاڵتوونی قوڕوە بەهۆی نەبوونی ئەمنییەتی شوێنی کار و دۆخی ناجێگیری کارەوە گیانی لەدەستدا. ناسنامەی ئەم کرێکارە ڕەحمەتوڵڵا بەختیارییە کە بە گوێرەی ئەم ڕاپۆرتە ناوبراو لە یەکەی بەردشکێن سەرقاڵی کار بووە لە کاتی کارکردندا کەوتە ژێر دەزگای بۆڵدۆزەر و گیانی لەدەستدا. ڕوحمەتوڵڵا بەختیاری تەمەن ٤٨ ساڵان، خێزاندار و باوکی ٣ منداڵە.
شایەنی باسە لە ساڵی ١٤٠٢ بەهۆی ڕووداوی کارەوە، بە کۆی گشتی ٢١١٥ کرێکار (٢٠٩٤ پیاو و ٢١ ژن) گیانیان لەدەستداوە کە بە بەراورد بە ساڵی ڕابردوو کە ١٩٠٠ کرێکار بوو، ١١.٣ لەسەد زیادی کردووە.
ئێران لەبواری ئەمنییەت و پاراستنی شوێنی کار لەنێو وڵاتانی جیهان لە ڕیزبەندی ١٠٢ دایە کە ئاستێکی یەکجار لەخوارەوەیە.
ئێران یەکێکە لە نائەمنترین وڵاتەکان لەبواری پاراستنی شوێنی کار و ساڵانە ژمارەیەکی زۆری کرێکاران بەهۆی نەبوونی ئەمنییەتی شوێنی کارەوە تووشی ڕووداو دەبن.
