
عەبدوڵڵا سووری، هاووڵاتیی تەمەن ٤٦ ساڵ و خەڵکی گوندی شیناوای سەربە میاندواو، لەلایەن دادگای شۆڕشی ئەم شارە بە حەوت ساڵ و شەش مانگ و یەک ڕۆژ زیندان سزا دراوە.
بەپێی ڕاپۆرتی کۆڵبەرنیوز، عەبدوڵڵا سووری دوای دادگاییکرانی لە دادگای شۆڕشی میاندواو، بە تۆمەتی «پەیوەندی لەگەڵ حیزبی کۆمەڵەی زەحمەتکێشان» بە حەوت ساڵ و شەش مانگ و یەک ڕۆژ زیندان سزا دراوە.
ئەم هاووڵاتییە لە ٢٦ی سەرماوەزی ١٤٠٤، لەلایەن هێزەکانی ڕژێم دەستبەسەر کرابوو. ناوبراو دوای ماوەیەک بە دانانی بارمتە و بە کاتی تا کۆتاییهاتنی دادگاییکردن لە زیندان ئازادکرا.
لە درێژەی گوشارەکانی ئەمنیی بۆ سەر بنەماڵەی عەبدوڵڵا سووری، کاروان سووری، کوڕە تەمەن ١٧ ساڵەکەی، هەرەوها لە ١٠ی خەرمانانی ١٤٠٥ لەلایەن هێزەکانی ئیدارەی ئیتلاعات دەستبەسەر کرا. ناوبراو دوای چوار ڕۆژ دەستبەسەرکران، بە دانانی بارمتەی چوار ملیار تمەنی ئازاد کرا.
تا کاتی ئامادەکردنی ئەم ڕاپۆرتە، وردەکاریی زیاتر لەبارەی دۆخی جێبەجێکردنی سزاکەی عەبدوڵڵا سووری و شوێنی تێپەڕاندنی ماوەی زیندانەکەی بڵاو نەکراوە.

