بەهۆی تەقەی ڕاستەوخۆی هێزە سەربازییەکان لە هێڵی سنووریی “چۆمان”ی بانە بەرەو ئۆتۆمبێلێک، بە گومانی هەبوونی کاڵای قاچاخ کاسبکارێکی گەنجی خەڵکی شاری بانە برینداربوو.
بەپێی ڕاپۆرتی کۆڵبەرنیوز، ڕۆژی چوارشەممە ٢٣ی ڕەشەمەمەی ١٤٠٢، هێزە سەربازییەکانی ڕژیم لە هێڵی سنووریی “چۆمان”ی بانە بە گوومانی هەبوونی کاڵای قاچاخ تەقەی ڕاستەوخۆیان لە ئۆتۆمبێلی کاسبکارێک کرد، کە بووە هۆی برینداربوونی کاسبکارە گەنجەکە، ناسنامەی ئەم کاسبکارە گەنجە: «محەمەد تۆفیقی»، ٢٠ ساڵ تەمەن و خەڵکی گوندی “چۆمان”ی سەر بە شاری بانەیە.
بەپێی هەواڵەکە، ئەم کاسبکارە هیچ کاڵاییەکی قاچاخی پێنەبووە و هێزە سەربازییەکان بە گوومانی کاڵای قاچاخ تەقەیان لە ئۆتۆمبێلی ناوبراو کرد.
شایانی باسە کە ناوبراو بۆ چارەسەر بۆ نەخۆشخانەی سەڵاحەدینی ئەیوبی لە بانە گواستراوەتەوە.
