«دکتۆر حوسێن شوکری، سابر بەساتی، نوورەدین چەلەنگەر، فەرەج ئەرسەن، ئیلیاس جەوانمەرد و ئەحمەد شێخی»، شەش هاوڵاتی خەڵکی شار و گوندە جیاوازەکانی پارێزگای ئیلام، لە ماوەی هەفتەکانی دواییدا لە درێژەی دەستبەسەرکردنە بەرفراوان و توندوتیژانەکانی هێزە ئەمنییەکانی کۆماری ئیسلامی دەستبەسەرکراون.
بەپێی ڕاپۆرتی کۆڵبەرنیوز لە ١٩ی بەفرانبار تا ٦ی رێبەندانی ١٤٠٤، «دکتۆر حوسێن شوکری، سابر بەساتی، نوورەدین چەلەنگەر، فەرەج ئەرسەن، ئیلیاس جەوانمەرد و ئەحمەد شێخی»، شەش هاوڵاتی خەڵکی پارێزگای ئیلام، لەلایەن هێزە ئەمنییەکانەوە و بەبێ بوونی بڕیاری دادوەری دەستبەسەر و بۆ شوێنە نادیارەکان گواستراونەتەوە.
– بەپێی زانیارییە بەردەستەکان، دکتۆر حوسێن شوکری، هاوڵاتی شاری ئیلام، ڕۆژی ٥ی رێبەندانی ١٤٠٤ دەستبەسەرکراوە و لەگەڵ تێپەڕبوونی هەشت ڕۆژ، هیچ زانیارییەک لەبارەی شوێنی ڕاگرتن و باری یاسایی ناوبراو لەبەردەستدا نییە.
– سابر بەساتی، گەنجێکی ٣٨ ساڵ و خەڵکی ئیلام و دانیشتووی کەرەج، ڕۆژی ١٩ی بەفرانباری ١٤٠٤ دەستبەسەرکراوە و تا ئێستا ٢٤ ڕۆژە لە دۆخی بێ ئاگاییدا بەسەردەبات.
– هەروەها نوورەدین چەلەنگەر، گەنجێکی کوردی ٣٠ ساڵ خەڵکی چەرداوەڵ، ڕۆژی ٦ی رێبەندانی ١٤٠٤ دەستبەسەرکراوە و حەوت ڕۆژ لە بێ ئاگایی لە دۆخی ناوبراو تێدەپەڕێت.
– فەرەج ئەرسەن، هاوڵاتی خەڵکی مەلەکشایی و چالاکوانی مەدەنی و ژینگەیی، ڕۆژی ٢٠ی بەفرانباری ١٤٠٤ دەستبەسەرکراوە و دوای ٢٣ ڕۆژ هێشتا لە دەستبەسەرکردندا بەسەردەبات. ناوبراو پێشتریش لە ١٥ی خاکەلێوەی ١٤٠٣دا، بەهۆی بەشداریکردن لە مەڕاسیمەکانی نەورۆزدا دەستبەسەرکرابوو.
– ئیلیاس جەوانمەرد، هاوڵاتی خەڵکی لۆمار، ڕۆژی ٢٩ی بەفرانباری ١٤٠٤ دەستبەسەرکراوە و لەگەڵ تێپەڕبوونی ١٤ ڕۆژ، بارودۆخی ناوبراو نادیار راگەیاندراوە.
– ئەحمەد شێخی، هاوڵاتی خەڵکی دێهلوران و کارمەندی بەڕێوەبەرایەتیی ئاو، هەروەها ڕۆژی ٢ی رێبەندانی ١٤٠٤ دەستبەسەرکراوە و تا ئێستا ١١ ڕۆژ لە کاتی دەستبەسەرکرانی ناوبراو تێپەڕیووە.
بەپێی ئەم ڕاپۆرتە، هەموو ئەم هاوڵاتیانە لە شوێنە نادیارەکاندا ڕاگیراون و لە مافی دەستڕاگەیشتن بە پارێزەر و بینینەوەی خێزان بێبەشکراون. تا کاتی ئامادەکردنی ئەم ڕاپۆرتە، هیچ زانیارییەکی فەرمی لەبارەی تۆمەتەکانی دژی ئەم هاوڵاتیانە لەبەردەستدا نییە.
