
ڕاشد ئیمامی، هونەرمەند و ئەندازیاری ڕووپێوی تەمەن ٣٣ ساڵی خەڵکی پاوە، لەگەڵ شلێر مودیرزادەی هاوسەری، لە دوای هێرشی هێزەکانی ئیدارەی ئیتلاعات جارێکی دیکە دەستبەسەرکران و بۆ شوێنێکی نادیار گوازرانەوە. ئەم دوو هاوژینە پێشتریش لە کاتی خۆپێشاندانەکانی بزووتنەوەی شۆڕشگێڕانی “ژینا”دا دەستبەسەرکرابوون.
بەپێی ڕاپۆرتی کۆڵبەرنیوز، هێزەکانی ڕژێم ڕۆژی دووشەممە ١٥ی تەممووزی ١٤٠٥، بە چوونە ناو ماڵی تایبەتی ئەم دوو هاوژینە لە شاری پاوە، سەرەتا ڕاشد ئیمامییان دەستبەسەر کردووە و بەبێ سزای دادوەری بۆ شوێنێکی نادیاریان گواستووەتەوە.
چەند کاتژمێرێک دوای ئەم دەستبەسەرکردنە، هێزەکانی ڕژێم جارێکی دیکە چوونەتەوە هەمان شوێن و ئەمجارەیان شلێر مودیرزادەیان بە توندوتیژی دەستبەسەر کردووە. دەستبەسەرکردنی هەردووکیان بەبێ بەڵگەنامەی دادوەری و بە گوشار و هەڵسوکەوتی ئەمنیدا ئەنجام دراوە.
تاکوو ئەم ساتە، بەدواداچوونەکانی بنەماڵە و کەسوکاری ئەم دوو هاوژینە بۆ ئاگاداربوون لە دۆخیان، شوێنی ڕاگرتنیان و تۆمەتەکانی دژیان بێوەڵامە و هیچ دەزگایەکی فەرمیش ڕوونکردنەوەی لەم بارەیەوە نەداوە.
ڕاشد ئیمامی پێشتریش لە بزووتنەوەی شۆڕشگێڕانی ژینادا لە سەرماوەزی ١٤٠١دا لەگەڵ براکەیدا دەستبەسەرکرابوو و پێشینەی دەستبەسەرکردنی ئەمنی لە دۆسێکەیدا هەیە.
لە ئێستادا هیچ زانیارییەک لەسەر هۆکارەکانی دەستبەسەرکردنەوەی ئەم دوو هاووڵاتییە و دۆخی ڕاگرتنیان لەبەردەستدا نییە.

