
سیامەک موفیدی و سرووش عەنایەتی، دوو لاوی تەمەن ١٦ و ۱۷ ساڵەی خەڵکی تکاب، لەلایەن هێزەکانی ڕژێم دەستبەسەر کراون و بۆ لێکۆڵینەوە بۆ تاران گوازرانەوە. ئەم دوو لاوە تاوەکو ئێستا لە مافی پارێزەر، پەیوەندیی تەلەفۆنی و دیدار لەگەڵ بنەماڵەکانیان بێبەش کراون.
بەپێی ڕاپۆرتی کۆڵبەرنیوز، ئێوارەی شەممە چواردەی خەرمانانی ١٤٠٥، سیامەک موفیدی تەمەن ۱۷ ساڵ و سرووش عەنایەتی تەمەن ١٦ ساڵ، بەبێ بڕیاری دادگا و بە هێرشکردنە سەر ماڵەکانیان لەلایەن هێزەکانی ڕژێم دەستبەسەر کران. بەپێی زانیارییەکان، دوای دەستبەسەرکردنیان، ڕەوانەی شوێنێکی نادیار کراون و پاشان لەژێر ڕێکاری ئەمنیی توند بۆ ئەنجامدانی لێکۆڵینەوە بۆ تاران گوازرانەوە. تاوەکو ئێستا شوێنی ڕاگرتنیان نادیارە.
گوایە سیامەک موفیدی و سرووش عەنایەتی لە ماوەی مانگەکانی ڕابردوودا لە کافەیەک لە تاران کاریان کردووە.
سەرەڕای تێپەڕبوونی چەند ڕۆژ بەسەر دەستبەسەرکردنی ئەم دوو لاوە، تاوەکو ئێستا هیچ زانیارییەک دەربارەی تۆمەتەکان یان هۆکاری دەستبەسەرکردنیان بڵاونەکراوە و دەزگای ئەمنیی هیچ ڕوونکردنەوەیەکیان لەم بارەیەوە نەداوە.
لە هەمان کاتدا، بنەماڵەی ئەم دوو لاوە تاوەکو ئێستا لە مافی پەیوەندی و دیدار لەگەڵ منداڵەکانیان بێبەش کراون و ڕێگەیان پێنەدراوە پارێزەر ببینن.

