
فەرەیدوون نامداری، هاووڵاتیی تەمەن ٥٥ ساڵەی خەڵکی سنە و شوعلە ڕۆحیی هاوسەرەکەی، دوای هێرشی هێزەکانی ئیدارەی ئیتلاعات بۆ شوێنی کار و ماڵی تایبەتییان، بە توندوتیژانە دەستبەسەر کران و بۆ شوێنێکی نادیار گوازرانەوە.
بەپێی ڕاپۆرتی کۆڵبەرنیوز، ڕۆژی یەکشەممە ١٥ خەرمانانی ١٤٠٥، نزیکەی ١٥ چەکداری هێزەکانی ئیدارەی ئیتلاعات بە چوونە سەر شوێنی کاری فەرەیدوون نامداری، بە توندوتیژی و بەبێ بڕیاری دادوەر، ناوبراویان دەستبەسەر کرد. دوای دەستبەسەرکردنی فەرەیدوون نامداری، هێزەکانی ئیدارەی ئیتلاعات چوونه سەر ماڵەکەی و وێڕای پشکنینی ماڵەکە، شوعلە ڕۆحیی هاوسەریان دەستبەسەر کرد و بۆ شوێنێکی نادیاریان گواستەوە.
بەپێی زانیارییەکان، هێزەکانی ڕژێم لە کاتی ئەم هێرشەدا، ماڵی ئەم هاوژینەیان پشکنیوە.
تا کاتی ئامادەکردنی ئەم ڕاپۆرتە، زانیارییەکی ورد لەسەر هۆکاری دەستبەسەرکردن، تۆمەتەکانیان و شوێنی ڕاگرتنی فەرەیدوون نامداری و شوعلە ڕۆحیی لە بەردەستدا نییە و بەدواداچوونی بنەماڵەکانیان بۆ ئاگاداربوون لە دۆخ و شوێنی ڕاگرتنیان تا ئێستا بێئەنجامە.

