«سۆران یاری»، لاوێکی ۱۹ ساڵانی خەڵکی شاری جوانرۆ، لە کاتی هێرشی هێزەکانی ئیدارەی ئیتلاعات بۆ سەر ماڵی خێزانەکەی، دوای کەوتنە خوارەوە لە سەربانەوە و شکانی قاچی، دەستبەسەر کراوە و بەبێ وەرگرتنی چاودێری پزیشکی بۆ شوێنێکی نادیار گواستراوەتەوو.
بەپێی ڕاپۆرتی کۆڵبەرنیوز، ڕۆژی یەکشەممە ١٥ی خەرمانانی ١٤٠٥، هێزەکانی ئیدارەی ئیتلاعات لە کاتژمێر پێنجی بەرەبەیان بە هێرشکردنە سەر ماڵی خێزانی سۆران یاری، ئەم لاوەیان دەستبەسەر کردووە. بەپێی ڕاپۆرتە بەدەستهاتووەکان، سۆران یاری بەدوای هاتنە ژوورەوەی لەناکاوی هێزە ئەمنییەکان و لە هەوڵی هەڵاتن لە ماڵەوەدا، لە سەربانەوە کەوتووەتە خوارەوە و لەئەنجامی ئەم ڕووداوەدا لە قاچی شکاوە. سەرەڕای برینداربوون و پێویستی بەپەلەی ناوبراو بۆ چارەسەری پزیشکی، هێزە ئەمنییەکان لەهەمان بارودۆخی جەستەییدا دەستبەسەریان کردووە و بۆ شوێنێکی نادیار گواستراوەتەوە.
تا کاتی ئامادەکردنی ئەم ڕاپۆرتە، هیچ زانیارییەکی ورد سەبارەت بە شوێنی مانەوە، بارودۆخی جەستەیی و دەستڕاگەیشتنی سۆران یاری بە خزمەتگوزارییە پزیشکییەکان لەبەدەستدا نییە. هەروەها هیچ زانیارییەک سەبارەت بە بارودۆخی دەستڕاگەیشتنی ناوبراو بە پارێزەر و ئیمکانی پەیوەندیکردنی لەگەڵ خێزانەکەی بڵاو نەکراوەتەوە.
بێبەشکردنی ئەم لاوە لە پەیوەندی لەگەڵ خێزان و دەستڕاگەیشتن بە خزمەتگوزارییە پزیشکییەکان، نیگەرانی سەبارەت بە بارودۆخی تەندروستی و مانەوەی ناوبراوی زیاتر کردووە.
