«عیزەدین پەسوپێش»، هاووڵاتیی خەڵکی پیرانشار، لە ئەنجامی هێرشی هێزە ئەمنییەکان بۆ سەر ماڵی باوکی، دەستبەسەر و بۆ شوێنێکی نادیار گواسترایەوە.
بەپێی ڕاپۆرتی کۆڵبەرنیوز، ڕۆژی یەکشەممە ٦ی گوڵانی ١٤٠٥، هێزەکانی ڕژیمی ئێران بەبێ نیشاندانی هیچ جۆرە حوکمێکی دادوەری، هەڵیانکوتاوەتە سەر ماڵی ئەم هاووڵاتییە لە پیرانشار و دەستبەسەریان کردووە. بەپێی زانیارییە بەدەستهاتووەکان، ئەم دەستبەسەرکردنە لەگەڵ دروستکردنی ترس و تۆقاندن لە شوێنەکەدا بووە.
تا کاتی بڵاوبوونەوەی ئەم هەواڵە، هیچ زانیارییەکی ورد لەسەر هۆکارەکانی دەستبەسەرکران، تۆمەتەکان و شوێنی ڕاگرتنی عیزەدین پەسوپێش لەبەر دەستدا نییە و ئەم هاووڵاتییە لە کاتی دەستبەسەرکردنییەوە لە مافی پارێزەر و پەیوەندی لەگەڵ بنەماڵەکەی بێبەش کراوە.
