ژینا ئەحمەدی، هونەرمەندی خەڵکی مەریوان و دامەزرێنەری ماڵی مۆسیقای «ژیلەمۆ»، سەرەڕای تێپەڕبوونی دە ڕۆژ بەسەر دەستبەسەرکردنیدا، هێشتا لە کەرەنتینەی بەشی ژنانی زیندانی ناوەندیی سنە ڕاگیراوە و لە مافی پارێزەر، پەیوەندیی تەلەفۆنی و چاوپێکەوتن لەگەڵ بنەماڵەکەی بێبەش کراوە.
بەپێی ڕاپۆرتی کۆڵبەرنیوز، ڕۆژی دووشەممە ١٣ی ڕەزبەری ١٤٠٥، ژینا ئەحمەدی، هونەرمەندی خەڵکی گوندی نگڵ و دانیشتووی مەریوان کە بە ناوی هونەریی «ژیلەمۆ» چالاکی دەکات، لەلایەن هێزەکانی ڕژێم لە ماڵەکەی خۆیدا لە مەریوان دەستبەسەر کرا و بۆ زیندانی ناوەندیی سنە گواسترایەوە.
بەپێی زانیارییەکان، ئەم هونەرمەندە لە ماوەی دە ڕۆژی ڕابردوودا لە کەرەنتینەی بەشی ژنانی زیندانی ناوەندیی سنە ڕاگیراوە و تا ئێستا لە مافی پارێزەر، پەیوەندیی تەلەفۆنی و چاوپێکەوتن لەگەڵ بنەماڵەکەی بێبەش بووە.
ژینا ئەحمەدی دامەزرێنەری ماڵی مۆسیقای «ژیلەمۆ»یە لە مەریوان؛ ناوەندێک کە لە بواری فێرکردنی مۆسیقا، گۆرانیوتن، وێنەکێشان و سینەما بۆ منداڵان چالاکی دەکات.
تا کاتی ئامادەکردنی ئەم ڕاپۆرتە، زانیارییەکی ورد لەسەر هۆکارەکانی دەستبەسەرکردنی ژینا ئەحمەدی و تۆمەتەکانی، بڵاو نەکراوەتەوە.
