یاسین سەمسام لە دەستبەسەرکراوانی خۆپیشاندانی سەرتاسەری ساڵی ١٤٠١، بۆ جێبەجێکرانی حوکمی بەندکران و لێدانی قامچی، ڕاگوێزی گرتووخانەی شنۆ کرا.
بە پێی ڕاپۆرتی کۆڵبەرنیوز ڕۆژی شەممە٢٩ی ڕەزبەری١٤٠٢، یاسین سەمسام لە دەستبەسەرکراوانی خۆپیشاندانی سەرتاسەری ساڵی ١٤٠١، بۆ جێبەجێکرانی حوکمی بەندکران و لێدانی قامچی، ڕاگوێزی گرتووخانەی شنۆ کرا. بەپێی ئەو ڕاپۆرتە، یاسین سەمسام لە دوای سەردانی بۆ لقی جێبەجێکرانی تاوان و سزای دادسەرای گشتی و ئینقلابی شنۆ، ڕاگوێزی گرتووخانەی ئەو شارە کرا.
یاسین سەمسام لە ڕێکەوتی ٢٢ی بەفرانباری١٤٠١، بەبێ بەڵگەی یاسایی لە لایەن هێزە ئەمنیەکانەوە دەستبەسەر و ڕاگوێزی گرتووخانەی شنۆ کرابوو.
ناوبراو مانگی جۆزەردانی ئەمساڵ لەلایەن دادگای ئینقلابی شنۆ بە تۆمەتی کۆبوونەوە و چالاکی دژ بە ئاساییشی وڵات لە ڕێگای بەشداری لە خۆپیشاندانەکان بە ٣ساڵ و ٩ مانگ بەندکران و بە تۆمەتی بەشداری لە لەناوبردنی ئانقەستی موڵکی گشتیی لە ڕێگای بەرد هاژوین و هەڵگرتنی کەرەستەی وەک کۆکتێل مۆلۆتۆف بە ١ ساڵ بەندکران و ٨٠ زەربەی قامچی مەحکووم کرابوو.
هەر وەها یاسین سەمسام پێشتریش لە تۆمەتی ئەندامێتیی لە یەکێک لە حیزبە کوردیەکانی دژبەری ڕژیم بەخشرابوو.
یاسین سەمسام لە دوای ٨ مانگ بەندکران بە دانانی بارمتە لە گرتووخانە ئازاد کرابوو. ناوبراو کوڕی یوسف و لە دایک بووی ساڵی ١٣٧٨ لە شاری شنۆیە.
