«موعین عەباسپوور»، گەنجێکی کوردی خەڵکی ئیلام و دانیشتووی گوڵشەهری کەرەج، یەکێکی تر لە گیانبەختکردووانی نارەزایەتییەکانی ئەم شارەیە کە بە تەقەی ڕاستەوخۆ و بە گوللەی جەنگی لەلایەن هێزە سەرکوتگەرەکانی کۆماری ئیسلامییەوە لە «دڵ»یدا کرایە ئامانج و گیانی لەدەستدا.
بەپێی ڕاپۆرتی کۆڵبەرنیوز، ئێوارەی ڕۆژی پێنجشەممە، ١٨ی بەفرانباری ١٤٠٤، «موعین عەباسپوور» کوڕی قاسم، لەدایکبووی ئیلام و دانیشتووی گەڕەکی گوڵشەهری کەرەج، لە کاتی نارەزایەتییە جەماوەرییەکان لە دڵیدا کرایە ئامانج بە تەقەی ڕاستەوخۆ و گیانی لەدەستدا. دایکی ناوبراو، دوای ڕوودانی ئەم ڕووداوە، تەرمی کوڕەکەی هەتا بەیانی لە باوەشدا گرت بۆ ئەوەی بتوانێت ڕێگری لە ڕفاندنی لەلایەن هێزە ئەمنییەکانەوە بکات.
خێزانەکەی دوای بەرگەگرتن لە کێشەی زۆر، توانییان تەرمی «موعین عەباسپوور» بگوازنەوە بۆ ئیلام و لەوێ بەخاکیبسپێرن. ئەم هەنگاوەی خێزانەکەی نیشاندەری بەرگەگرتنە لە بەرامبەر هەوڵی دامەزراوە ئەمنییەکان بۆ کۆنترۆڵکردن یان زەبتکردنی تەرمی گیانبەختکردووان.
«موعین عەباسپوور» یەکێک لە گەنجانی کوردی ئیلامی بوو کە بە چالاکی لە نارەزایەتییە جەماوەرییەکاندا بەشداریی کردبوو و بەم کوشتنە حکومەتییە، خێزان و کۆمەڵگای داخداری ناوبراو کرد.
