بەپێی هەواڵی گەیشتوو، دامودەزگا ئەمنییەکانی شاری مەهاباد لە ساڵڕۆژی ناڕەزایەتییە سەرتاسەرییەکانی ساڵی ١٤٠١دا، گوشاریان خستۆتە سەر دوکانداران و کاسبکارەکانی ئەم شارە تا دوکان و بازارەکان بە کراوەیی بهێڵنەوە.
بەپێی ڕاپۆرتی کۆڵبەرنیوز، بەپشت بەستن بە سەرچاوە ناوخۆییەکان، دامودەزگا ئەمنییەکانی شاری مەهاباد لە ساڵڕۆژی ناڕەزایەتییە سەرتاسەرییەکانی ساڵی ١٤٠١دا، دوکان و بازاڕەکانی ئەم شارەیان خستۆتە ژێر گوشار بۆ ئەوەی دووکانەکانیان دانەخەن.
بەپێی ئەم ڕاپۆرتە، هێزە ئەمنییەکان بەڵێنیان لە کاسبکاران وەرگرتووە کە خۆیان لە بەشداری مانگرتن و داخستنی دوکانەکانیان لە ٢٥ی خەرمانانی ١٤٠٢ کە ساڵڕۆژی کوشتنی ژینا ئەمینییە لەلایەن حکومەتەوە و سەرەتای ناڕەزایەتییە سەرتاسەرییەکانی ساڵی ١٤٠١ ببوێرن.
ئەم هەڕەشە و کردەوەی دامودەزگا ئەمنییەکان لەدژی کاسبکارانی شاری مەهاباد، لە کاتێکدایە کە ساڵی ڕابردوو لە کاتی ناڕەزایەتییە سەرتاسەرییەکانی ساڵی ١٤٠١، دوکاندار و کاسبکارەکان لە زۆربەی شارەکانی کوردستان بە شێوەیەکی بەرچاو بۆ ماوەی ڕۆژانی یەک لە دوای یەک مانگرتنی سەرتاسەرییان گرت و دوکان و بازاریان داخست.
