ڕۆژی هەینی، ڕێبەندانی ١٤٠٢، “بیلال شاهرۆخ” لە ئەنجامی کەوتنەخوارەوەی لە شاخێک لە هێڵی سنووری نەوسوود لە کاتی کۆڵبەریدا، لاقی بریندار بووە.
بەپێی ڕاپۆرتی کۆڵبەرنیوز، بیلال شاهرۆخ کۆڵبەری تەمەن ٢٤ ساڵ، خەڵکی گوندی “بانەوڕێ”ی سەربە شاری پاوە، لە کاتی کۆڵبەریدا لە بەرزاییەوە کەوتە خوارەوە و لاقی بریندار بوو.
هاوکات لە هەمان ڕۆژدا “ڕەشاد بابایی” کۆڵبەری تەمەن ٣٠ ساڵ، خەڵکی شاری سنە لە کاتی ڕاوەدوونانی لەلایەن هێزەکانی هەنگی مەرزی لە بەرزاییەکانی تەتە بەهۆی کەوتنەخوارەوەی لە شاخەوە بە سەختی بریندار ببوو.
پێشتر کۆلبەرنیوز هەواڵی لەم بارەیەوە بڵاوکردبووەوە.
بە پشتبەستن بەو ئامارانەی لە ساڵی ٢٠٢٣ی زایینیدا لە کۆڵبەرنیوز تۆمارکراون، بە گشتی ٢٩٩ کۆڵبەر لە ناوچە سنوورییەکان و ڕێگاکانی نێوان جادەکانی پارێزگاکانی ئازەربایجانی ڕۆژئاوا، کوردستان و کرماشان بەهۆی هۆکارەکانی وەک تەقەی ڕاستەوخۆی هێزە نیزامییەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوارەوە لە شاخ و بەرزاییەکان و حاڵەتەکانی ترەوە کوژراون و بریندار بوون. لەم ژمارەیە بەگشتیی ٣٢ کۆڵبەر (١١%) کوژراون و ٢٦٧ کۆڵبەر (٨٩%) بریندار بوون. لە کۆی گشتی ٢٩٩ کۆڵبەری کە کوژراون و بریندار بوون، ٢٦١ حاڵەت (٨٧%) بەهۆی تەقەی ڕاستەوخۆی هێزە سەربازییەکان بووە. لە کۆی گشتی ٢٩٩ کۆڵبەری کە کوژراون و بریندار بوون، ٣٠ کەسیان منداڵی خوار ١٨ ساڵن
