کاوان سەبوری، ئیحسان سەبوری و حسام سەبوری سێ هاوڵاتی خەڵکی شاری کامێران لەلایەن هێزەکانی ڕژیم دەستبەسەرکران و بۆ شوێنێکی نادیار گواستراونەتەوە.
بەپێی ڕاپۆرتی کۆڵبەرنیوز، سەرلەبەیانی هەینی ٢١ خەرمانانی ١٤٠٤، کاوان سەبوری تەمەن ١٧ ساڵ، ئیحسان سەبوری تەمەن ١٧ ساڵ و حسام سەبوری تەمەن ٢٨ ساڵ، سێ هاوڵاتی خەڵکی گوندی «گازرخانی»ی سەربە شاری کامێران، لەلایەن هێزەکانی ڕژیم دەستبەسەرکران و بۆ شوێنێکی نادیار گواستراونەتەوە. بەپێی ئەم ڕاپۆرتە هێزەکانی ڕژیم کاتژمێر پێنجی بەیانی ئەمڕۆ هەینی هێرشیان کردە سەر ماڵی ئەم سێ هاوڵاتییە و دەستبەسەریان کردوون.
حسام سەبوری پاش چەندین کاتژمێر لێپرسینەوە لەلایەن هێزەکانی ڕژیم ئازادکراوە. چارەنووسی کاوان سەبوری و ئیحسان سەبوری دوو منداڵەکەی تەمەن ١٧ ساڵ نادیارە. نەبوونی زانیاری لە دۆخی ئەم هاوڵاتییە بنەماڵەکانیانی نیگەران کردووە.
تا کاتی نووسینی ئەم ڕاپۆرتە هۆکارەکانی دەستبەسەرکران، شوێنی مانەوە و تۆمەتەکانی دژی ئەم هاوڵاتییانە نادیارە.
