«محەممەدڕەزا عەوەزپوور»، گەنجێکی ١٩ ساڵانی کوردی خەڵکی گوندی “ڕەماوەند” سەر بە دەرەشار لە پارێزگای ئیلام، یەکێکی تر لە گیانبەختکردووانی نارەزایەتییە سەرتاسەرییەکان لە تارانە کە لە کاتی سەرکوتکردنی نارازیان بە تەقەی ڕاستەوخۆی گوللەی جەنگی هێزەکانی رژیم گیانی بەختکرد.

بەپێی ڕاپۆرتی کۆڵبەرنیوز، «محەممەدڕەزا عەوەزپوور» ئێوارەی پێنجشەممە ١٨ی بەفرانباری ١٤٠٤ لە تاران کرایە ئامانجی تەقەی ڕاستەوخۆی هێزە سەرکوتگەرەکانی کۆماری ئیسلامی و گیانی لەدەستدا. تەرمی ئەم گەنجە کوردە یەک ڕۆژ دوای گیانبەختکرانی، واتە رۆژی هەینی ١٩ی مانگی بەفرانبار، ڕادەستی خێزانەکەی کرایەوە و ڕۆژی شەممە ٢١ی بەفرانباری ١٤٠٤، لە گۆڕستانی گوندی “ڕەماوەند” بە خاک سپێردرا.
ڕادەستکردنی تەرمی گیانبەختکردووانی نارەزایەتییەکان بە شێوەیەکی ئاسایی لەگەڵ فشارە ئەمنییەکان و کۆنتڕۆڵی دامەزراوە حکومییەکاندا دێت و خێزانەکان لە زۆربەی حاڵەتەکاندا لەژێر چاودێری ڕاستەوخۆدان بۆ ئەوەی وردەکارییەکانی مەراسمی بەخاکسپاردنەکان، ژمارەی بەشداربووان و شوێنی بەخاکسپاردن سنووردار بکرێت. ئەم پڕۆسەیە بووەتە هۆی ئەوەی خێزانەکان زۆرجار ناچار بن بۆ بەخاکسپاردنی خۆشەویستانیان ڕێڕەوە جێگرەوە و گوندەکانی دەوروبەر هەڵبژێرن.

