دوای تێپەڕبوونی ٢٩ ڕۆژ لە دەستبەسەرکرانی عەلی خانی، هاوڵاتیی کوردی خەڵکی بوجنوورد، هێشتا هیچ زانیارییەک لەبارەی شوێنی ڕاگرتن و دۆخی جەستەیی و یاسایی ناوبراوەوە لەبەردەستدا نییە و بەردەوامبوونی ئەم بێهەواڵییە، نیگەرانییەکانی لەبارەی گیان و چارەنووسی ئەم هاوڵاتییەوە زیادی کردووە.
بەپێی ڕاپۆرتی کۆڵبەرنیوز لە ڕۆژی پێنجشەممە، ١٨ی بەفرانباری ١٤٠٤، عەلی خانی لەلایەن هێزە ئەمنییەکانەوە و بەبێ بوونی هیچ بڕیارێکی دادگایی دەستبەسەر کراوە و بۆ شوێنێکی نادیار گواسترایەوە. لە کاتی دەستبەسەرکرانیەوە تا ئێستا، دامەزراوە ئەمنییەکان لە هەر ڕوونکردنەوەیەکی فەرمی لەبارەی شوێنی ڕاگرتن یان تاوانبارکردنە ئەگەرییەکانی ئەم هاوڵاتیە کوردە خۆدەپارێزن.
بەپێی زانیارییە بەدەستهاتووەکان، عەلی خانی لە ماوەی دەستبەسەرکرانیدا لە مافی دەستڕاگەیشتن بە پارێزەر و چاوپێکەوتن لەگەڵ خێزانەکەی بێبەش کراوە. لەگەڵ ئەوەشدا، ناوبراو لەم ڕۆژانەی دواییدا تەنها توانیویە کە یەک پەیوەندیی تەلەفۆنیی کورت لەگەڵ خێزانەکەی بگرێت و لەم پەیوەندییەدا، هەواڵی لەبارەی بارودۆخێکی زۆر نالەبار و خراپی خۆی لە شوێنی دەستبەسەرکرانیدا راگەیاندووە.
سەرچاوەکانی نزیک لە خێزانی عەلی خانی ڕایانگەیاندووە کە فشارە ئەمنییەکان و نەبوونی هیچ وەڵامدانەوەیەکی فەرمی، بووەتە هۆی زیادبوونی نیگەرانیی توندی نزیکانی ناوبراو سەبارەت بە تەندروستی جەستەیی و دەروونی و هەروەها چارەنووسی نەزانراوی ئەم هاوڵاتییە.
