بە تێپەڕبوونی چەند هەفتە زیاتر لە کاتی دەستبەسەرکرانی «عەلی بووژنە»، هاووڵاتیی ٦٥ ساڵەی خەڵکی شاری میراوا، تا ئێستا هیچ زانیارییەکی ڕوون لەبارەی دۆخ و شوێنی مانەوەی ناوبراو بڵاو نەکراوەتەوە و بەردەوامبوونی ئەم بێئاگاییە نیگەرانی خانەوادەکەی زیاتر کردووە.
بەپێی ڕاپۆرتی کۆڵبەرنیوز، عەلی بووژنە، خەڵکی گوندی «ساوان جەدید»ی سەر بە شاری میراوا، لە کاتی شەڕی ٤٠ ڕۆژەی نێوان ئێران، ئەمریکا و ئیسرائیل، لەلایەن هێزە حکومییەکانی کۆماری ئیسلامیی ئێرانەوە دەستبەسەر کراوە.
بەپێی زانیارییە بەدەستهاتووەکان، بنەماڵەی ئەم هاووڵاتییە لە هەفتەکانی ڕابردوودا چەندین جار سەردانی لای دامەزراوە ئەمنی و دادپەروەرییەکانی میراوا و سەردەشتیان کردووە، بەڵام بەرپرسان هەتا ئێستا لە پێدانی ڕوونکردنەوەی ئاشکرا دەربارەی هۆکارەکانی دەستبەسەرکران، تۆمەتەکانی دژی و دۆخی جەستەیی و شوێنی مانەوەی ناوبراو خۆیان پاراستووە.
بەردەوامی دەستبەسەرکران و دووربوونی ئەم هاووڵاتییە بەساڵاچووە لە پەیوەندی لەگەڵ خانەوادەکەی، نیگەرانییەکانی لەبارەی دۆخی تەندروستی و دۆخی مانەوەی ناوبراوی زیاتر کردووە.
