نیلوفەر حەقی بوژانی، هاووڵاتیی تەمەن ٢٢ ساڵی خەڵکی کرماشان، لە دوای هێرشی هێزەکانی ڕێکخراوی ئیتلاعاتی سوپای پاسداران بۆ سەر ماڵی بنەماڵەکەی، دەستبەسەر کرا و بۆ شوێنێکی نادیار گوازرایەوە.
بەپێی ڕاپۆرتی کۆڵبەرنیوز، ڕۆژی چوارشەممە ١٥ی ڕەزبەری ١٤٠٥، هێزەکانی ڕێکخراوی ئیتلاعاتی سوپای پاسداران چوونەتە سەر ماڵی بنەماڵەی نیلوفەر حەقی بوژانی لە کرماشان و بەبێ بڕیاری دادگا، هەستاون بە دەستبەسەرکردنی ئەم هاووڵاتییە و بۆ شوێنێکی نادیاریان گواستووەتەوە.
بەپێی زانیارییەکان، دەستبەسەرکردنی نیلوفەر حەقی بوژانی پەیوەندی بە چالاکییەکانی ناوبراو لە تۆڕەکانی کۆمەڵایەتیی و بڵاوکردنەوەی بابەت و ستۆریی ناڕەزایەتی لە پەڕەی تایبەتیی ئینستاگرامەکەی هەبووە. ناوبراو پێشتریش بەهۆی چالاکییەکانی لە تۆڕەکانی کۆمەڵایەتیی، لەلایەن ڕێکخراوی ئیتلاعاتی سوپاوە بانگهێشت کرابوو و بۆ ماوەی چەندین کاتژمێر لێپرسینەوەی لێ کرابوو.
بە تێپەڕبوونی یەک ڕۆژ بەسەر دەستبەسەرکردنی ئەم هاووڵاتییەدا، تا ئێستا هیچ زانیارییەک لەسەر شوێنی ڕاگرتن، بارودۆخی تەندروستی و تۆمەتەکانی، لەبەر دەستدا نییە.
