دوو منداڵی بەلووچ لە شارستانی دەشتیاری، بەهۆی کەوتنە ناو “هووتەگ” (چاڵاوی ئاو)، گیانیان لەدەستدا.
بەپێی ڕاپۆرتی کۆڵبەرنیوز بە گواستنەوە لە سەرچاوەکانی بەلووچستان، ڕۆژی یەکشەممە ١٦ی خاکەلێوەی ١٤٠٥، “ئیلیاس بەلووچ” تەمەن ٤ ساڵ، کوڕی ڕەزاق و خەڵکی گوندی گوڵستان، هەروەها ڕۆژی چوارشەممە ١٩ی خاکەلێوەی ١٤٠٥، “ئەبووزەر جەدگال” تەمەن ١١ ساڵ، کوڕی کەریم و خەڵکی گوندی سیتار مەحموود، هەرکام لە ڕووداوی جیاوازدا بەهۆی کەوتنە ناو هووتەگ خنکان و گیانیان لەدەستدا.
هووتەگ یان هووتک، ئەو چاڵانەن کە بە مەبەستی کۆکردنەوە و پاشەکەوتکردنی ئاو، زۆربەی جار بۆ بەکارهێنانی ئاژەڵ هەڵدەکەنرێن، بەڵام لە ساڵانی ڕابردوودا و بەهۆی توندبوونەوەی قەیرانی بێئاوی لە ناوچە باشوورییەکان، دانیشتووان ناچارن ئەم سەرچاوانە بۆ پێداویستیی ڕۆژانە و تەنانەت بۆ خواردنەوەش بەکاربهێنن؛ ئەمەش مەترسی جدی بەتایبەت بۆ منداڵان لێدەکەوێتەوە.
بەپێی زانیارییە بەردەستەکان، لە ساڵی ٢٠٢٥ی زایینیدا لانی کەم ٩ منداڵ و مێرمنداڵی بەلووچ بەهۆی خنکانەوە گیانیان لەدەستداوە، کە لەو ژمارەیە سێ کەسیان بەهۆی کەوتنە ناو هووتەگەوە بووە. ئەم ئامارانە نیشاندەری بەردەوامیی مەترسییە بنەڕەتییەکان و نەبوونی سەلامەتی لە سەرچاوەکانی ئاوی ئەو ناوچانەدایە.
