“تەیب عەبدوڵڵاپوور”، زیندانی سیاسی خەڵکی گوندی «شینئاوا»ی سەر بە شاری پیرانشار، ڕۆژی سێشەممە ١٤ی رێبەندانی ١٤٠٤ لە زیندانی نەغەدەوە بۆ مۆڵەتی دە ڕۆژە نێردراوە و بەپێی ڕاگەیاندنی سەرچاوە ئاگادارەکان، ئەو پێویستە کە ڕۆژی یەکشەممە ٢٦ی رێبەندان ١٤٠٤ بۆ ئەم زیندانە بگەرێتەوە.
بەپێی ڕاپۆرتی کۆڵبەرنیوز، ڕۆژی شەممە ٢٠ی بەفرانباری ١٤٠٤، تەیب عەبدوڵڵاپوور بۆ جێبەجێکردنی حوکمی قەتیی ٢٠ مانگ زیندان، خۆی بە زیندانی نەغەدە ناساندووە و ماوەی سزاکەی دەستی پێکردووە.
بەپێی بنەمای بڕیارنامەی دەرچووی بەشی یەکەمی دادگای ئینقلابی دادگەری شارستانی مەهاباد، “تەیب عەبدوڵڵاپوور” لە بەرواری ٢٩ی رێبەندانی ١٤٠٢ بە تۆمەتی “ئەندامێتی لە یەکێک لە پارتە کوردستانییەکان” بە ٣٢ مانگ زیندانی تەعزیری و بە تۆمەتی “پروپاگەندە دژی رژیم” بە ٩ مانگ زیندانی تەعزیری سزا درابوو. بە جێبەجێکردنی ماددەی ١٣٤ی یاسای سزادانی ئیسلامی، توندترین سزا بۆ جێبەجێکردن دیاری کراوە و لە کۆتاییدا بە لەبەرچاوگرتنی خێزاندار بوون، هەبوونی دوو منداڵ و دۆخی دەروونی و ڕەوانی، لەسەر بنەمای بەشی “ب”ی ماددەی ٣٧ی یاسای سزادانی ئیسلامی، ڕێژەی زیندانی جێبەجێکراو بۆ ناوبراو ٢٠ مانگ دیاری کراوە. هەروەها ناوبراو لە تۆمەتی “کۆبوونەوە و پیلان لە دژی ئاسایشی نیشتمانی” بێتاوان دەرچوو.
“تەیب عەبدوڵڵاپوور” بەیانی دووشەممە ١٩ی پووشپەری ١٤٠٢ لەلایەن هێزە ئەمنییەکانەوە و بەبێ بوونی بڕیاری دادوەری دەستبەسەر و بۆ شوێنێکی نادیار گواسترابوویەوە، و دوای تەواوبوونی قۆناغەکانی لێپرسینەوە، بە دانانی بارمتە بە شێوەیەکی کاتی ئازاد کرابوو.
