«ڕەزا نادری»، هاووڵاتیی ٢٧ ساڵەی خەڵکی کرماشان، ناسنامەی یەکێکی تر لە گیانبەختکردووانی نارەزایەتییە جەماوەرییەکانی ئەم شارەیە.
بەپێی ڕاپۆرتی کۆڵبەرنیوز، رۆژی پێنجشەممە ١٨ی بەفرانباری ١٤٠٤، ڕەزا نادری لە کاتی نارەزایەتییە جەماوەرییەکان لە «کرناچی»ی کرماشان، کرایە ئامانجی تەقەی راستەوخۆی گوللەی جەنگی هێزە سەرکوتگەرەکانی کۆماری ئیسلامی و گیانی لەدەستدا. تەرمی ئەم هاووڵاتییە پاش ماوەیەک، لە ئارامگەی گوندی «قەڵالان» لە ناوچەی بیلوارەی کرماشان بە خاک سپێردرا.
بەپێی زانیارییە بەدەستهاتووەکان، بنەماڵەی ئەم گیانبەختکردووە لە پرۆسەی وەرگرتنەوەی تەرم و ئەنجامدانی مراسمی خاکسپاردنی ناوبراو ڕووبەڕووی گوشاری ئەمنیەتی بوونەتەوە، و دەزگا ئەمنیەتییەکان هەوڵیانداوە لە ڕاگەیاندنی سەربەخۆ دەربارەی وردەکارییەکانی ئەم کوژرانە دووریان بخەنەوە.
