«ئەستی محەمەدی»، هاووڵاتییەکی تەمەن ٦٧ ساڵ و دایکی دوو چالاکی سیاسیی خەڵکی شاری بۆکان، لەلایەن هێزەکانی ڕژیم دەستبەسەر و بۆ شوێنێکی نادیار گواسترایەوە.
بەپێی ڕاپۆرتی کۆڵبەرنیوز، ئێوارەی دووشەممە ٢١ی گوڵانی ١٤٠٥، هێزەکانی ڕژیم هەڵیانکوتاوەتە سەر ماڵی ئەستی محەمەدی هاووڵاتیی تەمەن ٦٧ ساڵ، و بەبێ نیشاندانی حوکمی دادوەری و بەدەر لە ڕێکارە یاساییەکان، ناوبراویان دەستبەسەر کردووە. تا ئێستا هیچ زانیارییەکی ورد لەبارەی شوێنی ڕاگرتنی، دۆخی تەندروستی، تۆمەتەکانی دژی و یان ئەگەری دەستراگەیشتنی ناوبراو بە پارێزەر و بنەماڵەکەی بڵاونەکراوەتەوە.
بەپێی زانیارییە بەدەستهاتووەکان، ئەستی محەمەدی نەخۆشیی درێژخایەنی هەیە و بەردەوام پێویستی بە دەرمان و چاودێریی پزیشکی هەیە. بەردەوامیی بێ ئاگایی و بێهەواڵی لە دۆخی ئەم ژنە بەساڵاچووە و ئەگەری بێبەشکردنی لە خزمەتگوزارییە دەرمانییەکان، نیگەرانییەکی زۆری لەبارەی تەندروستی و گیانی ناوبراو دروست کردووە.
دەستبەسەرکردنی ئەندامانی بنەماڵەی چالاکانی سیاسی و مەدەنی، بەبێ ڕاگەیاندنی تۆمەت و بەبێ تەواوکردنی ڕێکارە یاساییەکان، لە ماوەی ساڵانی ڕابردوودا چەندین جار لەلایەن ناوەندەکانی مافی مرۆڤەوە ڕەخنەی لێ گیراوە. چالاکانی مافی مرۆڤ ئەم جۆرە کارانە وەک هەوڵێک بۆ دروستکردنی گوشاری دەروونی، ترساندن و سنووردارکردنی چالاکییە مەدەنی و سیاسییەکان هەڵدەسەنگێنن.
هەروەها، بێبەشکردنی دەستبەسەرکراوان، بەتایبەت بەساڵاچووان و ئەو کەسانەی نەخۆشییان هەیە، لە هەبوونی خزمەتگوزارییە دەرمانییەکان، پەیوەندی لەگەڵ بنەماڵە و مافە سەرەتاییە یاساییەکان، بە پێشێلکارییەکی ئاشکرای بنەماکانی دادگاییکردنی دادپەروەرانە و مافە بنەڕەتییەکانی مرۆڤ دادەنرێت.
