ئەمین باشوکی، کاوە قادری، ڕەحمان خاڵخانی، فەرهاد کەریمی، سامان کاکەمەمی و سامان سەیدمەحموودیان، شەش هاووڵاتی خەڵکی شاری نەغەدە لەلایەن هێزەکانی ڕژیم دەستبەسەرکران و بۆ شوێنێکی نادیار گواسترانەوە.

بەپێی ڕاپۆرتی کۆڵبەرنیوز، ڕۆژی پێنجشەمە پێنجی پووشپەڕی ١٤٠٤، سامان سەیدمەحموودیان، تەمەن سی ساڵ و سامان کاکەمەمی لەلایەن هێزەکانی ڕژیم دەستبەسەرکران و بۆ شوێنێکی نادیار گواسترانەوە. بەپێی ڕاپۆرتێکی دیکە، ڕۆژی سێشەمە سێی پووشپەڕی ١٤٠٤، ئەمین باشوکی، کاوە قادری، ڕەحمان خاڵخاڵی و فەرهاد کەریمی، چوار هاووڵاتی دیکەی خەڵکی شاری نەغەدە، لەلایەن هێزەکانی ڕژیم لەم شارەدا دەستبەسەرکران و بۆ شوێنێکی نادیار گواسترانەوە.
بەپێی ئەم ڕاپۆرتە، هێزەکانی ڕژیم بەبێ بڕیاری دادوەر ئەم هاووڵاتییانەی دەستبەسەر کردووە و کەرەستەی تایبەتی ئەوان وەکو تەلەفۆن و لاپتۆپ لەگەڵ خۆیاندا بردووە.
تا کاتی نووسینی ئەم ڕاپۆرتە، هۆکارەکانی دەستبەسەری، شوێنی مانەوە و تۆمەتەکانی دژی ئەم هاووڵاتییانە نادیارن.

