محەممەد سوهرابی، هاوڵاتی خەڵکی پیرانشار و دەستبەسەرکراوی بزووتنەوەی شۆڕشگێڕانەی «ژینا»، پاش ٣١٨ ڕۆژ دەستبەسەرکران بە کەفالەتی کاتی ملیارێک و ٥٠٠ ملیۆن تمەن لە زیندانیی ناوەندی نەغەدە ئازادکرا.
بەپێی ڕاپۆرتی کۆڵبەرنیوز ڕۆژی چوارشەممە ١٢ سەرماوەزی ١٤٠٤، محەممەد سوهرابی، هاوڵاتی خەڵکی پیرانشار و دەستبەسەرکراوی بزووتنەوەی شۆڕشگێڕانەی ژینا، پاش ٣١٨ ڕۆژ دەستبەسەرکران «نزیکەی یازدە مانگ» بە کەفالەتی کاتی ملیارێک و ٥٠٠ ملیۆن تمەن تا کۆتایی دادگاییەکەی، لە زیندانیی ناوەندی نەغەدە ئازادکرا.
بە گوتەی سەرچاوەیەکی ئاگادار، ئازادیی ناوبراو لە مانگەکانی ڕابردوودا سەرەڕای پێدانی کەفالەت، چەندین جار لەلایەن ناوەندەکانی ئەمنی ڕێگری لێکراوە.
محەممەد سوهرابی، لە یەکی ڕێبەندانی ١٤٠٣، لە شوێنی کارەکەی دەستبەسەرکرا و هەمان ڕۆژ ماڵی ناوبراو پشکنینی بۆکراوە. پاش کۆتایی لێپرسینەوەکەی، بەبێ ڕاگەیاندنی تاوانەکەی بۆ زیندانیی ناوەندی نەغەدە گواسترایەوە.
محەممەد سوهرابی پێشتر لە بزووتنەوەی شۆڕشگێڕانەی ژینا دەستبەسەرکرا و لەلایەن دەزگای دادوەری کۆماری ئیسلامی ئێران بە ١٦ مانگ زیندانیی تەعزیری و ساڵێک دوورخستنەوە سزادرابوو.
