سدیق مەحموودی، کرێکاری تەمەن ٦٠ ساڵ خەڵکی سنە، زیاتر لە هەفتەیەکە لەلایەن هێزەکانی ڕژیم لەم شارەدا دەستبەسەرکرا و هێشتا دۆخ و شوێنیی زیندانی ناوبراو نادیارە.
بەپێی ڕاپۆرتی کۆڵبەرنیوز، سدیق مەحموودی، کرێکاری کارگەی سیم لە گەڕەکی کاراموزی شاری سنە، زیاتر لە هەفتەیەکە بەهۆکاری نادیار لەلایەن هێزەکانی ڕژیم دەستبەسەرکرا و چارەنووسی نادیارە. بەپێی ئەم ڕاپۆرتە، ڕۆژی شەممە شەشی بەفرانباری ١٤٠٤، هێزەکانی ڕژیم هێرشیان کردەسەر ماڵی سدیق مەحموودی لە شاری سنە، بۆ سازکردنی ترس و دڵەڕاوکێ و پشکنینی ماڵەکەی، دەستیان بەسەر تەلەفۆنی ناوبراودا گرتووە و دەستبەسەریان کردووە.
تاکاتی نووسینی ئەم ڕاپۆرتە، هۆکاری دەستبەسەریی ئەم کرێکارە نادیارە و بەدواداچوونی بنەماڵەی ناوبراو بێئەنجامە.
بەهۆی پیری و نەخۆشیەکانی سدیق مەحموودی، سەلامەتی ناوبراو نیگەرانکەرە و هێزەکانی ڕژیم لە سەلامەتی ئەم هاوڵاتییە دەستبەسەرکراوە بەرپرسیارن.
