فەردین مەولوودی، زیندانیی سیاسی پێشوو و دەستبەسەرکراوی ڕووداوی شەڕی دوازدە ڕۆژە بە پێنج ساڵ زیندانیی تەعزیری سزادراوە.
بەپێی ڕاپۆرتی کۆڵبەرنیوز، فەردین مەولوودی هاوڵاتی تەمەن ٣٦ ساڵ خەڵکی سنە، لەلایەن لقی یەکی دادگای شۆڕشی سنە بە سەرۆکایەتی دادوەر مستەفا عەزیزی بە تۆمەتی «گردبوونەوە و پشتیوانی دژی ئاسایشی نەتەوەیی» بە پێنج ساڵ زیندانیی تەعزیری سزادراوە.
ئەم بڕیارە لەکاتێکدا دەرچووە کە فەردین مەولوودی لە پێنج مانگی ڕابردوودا دەستبەسەرە و بەهۆی کێشەی جەستەیی، توانای زیندانیی ماوەدرێژی نییە.
فەردین مەولوودی، ڕۆژی شەممە ٧ پووشپەڕی ١٤٠٤، لە شەپۆلی فراوانی دەستبەسەرکرانی پاش شەڕی دوازدە ڕۆژەی ئێران و ئیسرائیل لەلایەن هێزەکانی ئیتلاعاتی سوپا لە سنە دەستبەسەرکرا و پاش ماوەیەک بۆ زیندانیی ناوەندی ئەم شارە گواسترایەوە.
ئەم زیندانییە سیاسیە پێشتر چەندین جار دەستبەسەرکراوە و سزادراوە.
