چیاکۆ قوروەیی، چالاکوانی مەدەنی شاری سنە، لە لقی یەکی دادگای شۆڕشی ئیسلامی ئەم شارەدا دادگایی کرا.
بەپێی ڕاپۆرتی کۆڵبەرنیوز، ڕۆژی چوارشەمە ٢٠ی خاکەلێوەی ١٤٠٤، چیاکۆ قوروەیی، چالاکوانی مەدەنی شاری سنە، بە تۆمەتەکانی وەکو «بانگەشە دژی ڕژیم» و «تێکدانی یاسا و ئاسایشی گشتی» لە لقی یەکی دادگای شۆڕشی ئیسلامی شاری سنە دادگایی کرا.
بەپێی ئەم ڕاپۆرتە، بە تاوانی وەکو هەڵگرتنی درووشمەکانی کۆمەڵە، گوتنەوەی سروودی «ئینتەرناسیۆناڵ» و سروودە سیاسییەکانی دیکە و بەشداری لە ڕێوڕەسمی ئەسپەردەکردنی دایە فەراسەت «جەعفەر قشڵاقی»، لە دایکانی شۆڕشی بزووتنەوەی شۆڕشگێڕانەی کوردستان، لەو تاوانانەن کە لە دۆسیەی ئەم چالاکە مەدەنییەدا هاتووە.
لە درێژەی دانیشتنەکەدا، چیاکۆ قوروەیی بۆ ڕەتکردنەوەی تۆمەتەکانی، لە چالاکییە سنفی و مەدەنییەکانی خۆی بەرگری کردووە.
دادگا بەم چالاکەی کرێکاری ڕایگەیاندووە کە بڕیاری کۆتایی لەم ڕۆژانەی داهاتوودا بە ناوبراو ڕادەگەیەنێت.
شایانی باسە کە دوێنێ ١٩ی خاکەلێوە، دانیشتنی دادگایی بۆ تۆمەتەکانی ٧ چالاکوانی کرێکاری و مەدەنی شاری سنە، سەید خالیدی حسێنی، جەمال ئەسەدی، ئێقباڵ شەبانی، فەردین میرەکی، شەیس ئەمانی، فەرشید عەبدوڵڵایی، ئارمان سەلیمی و سووسەن ڕازانی، بە هەمان تۆمەتەکانی هاوشێوە لە لقی ناوبراو بەڕێوەچووبوو.
چیاکۆ قوروەیی، پێشتر لە ٨ی ڕێبەندانی ١٤٠٣، دەستبەسەر و پاش ٥ ڕۆژ بە دانانی بارمتە ئازاد کرابوو.
